Nagtulo ang luha sang mga doktor kag pila ka personnel sang Department of Social Welfare and Development (DSWD) sang ginpahayag sang 11 anyos nga babayi nga pasyente nga indi sini luyag nga mapatay ang iya iloy, kag gusto lamang sini nga indi na makagwa sa prisuhan apisar sa pagkastigo sa iya.
Madumduman nga ang ginrescue ang 11 anyos nga bata matapos makapalagyo sang siya ang ginpulihan kastigo sang iya iloy, duha ka tiyo kag isa ka tiya.
Ang bata ang may multiple hematoma, multiple abrasion, swelling, fracture kag pila ka kinagtan sang ido.
Madumduman nga ang biktima ang ginkastigo sang apat ka persona matapos nga wala sini mapuno ang ginapasag-uban nga drum.
Bangod nga sa tupad sang nahigot nga pitbull ginkastigo ang bata, ini ang makapila man nga ginkagat sang ido.
Ang bata ang ginkampusan man sang martilyo kag tubo sa kamot, samtang gina-alegar nga may 16 anyos pa nga utod ang iloy nga nakapalagyo, nga amo ang masami nagahakwat kag nagalampos sa bata.
Nahibaluan nga ang biktima ang bunga sa pagpanglugos sa iya iloy, gani ini ang wala sang amor sa bata.
Suno kay Dr. Vicente Iturriaga, medical doctor sa Teresita Lopez Jalandoni Provincial Hospital sa Silay City, wala nalakip sa mga nagkastigo sa bata ang live-in partner sang iya iloy, sa baylo ini pa ang naga-apin sa biktima.
Sa karun, maayo naman ang kondisyon sang bata, apang ini ang ipaidalum pa sa CT Scan kag ginalantaw nga itransfer sa Corazol Locsin Montelibano Memorial Regional Hospital, nga may orthopedic nga makabulong sa nafracture sini nga siko.
Pahayag sang doktor nga maalam magsabat ang bata.
Sang ini ang iya ginpapili kun luyag sini nga ipapriso ukon sentinsyahan sang kamatayon ang iya iloy, nagpahayag ang bata nga luyag lamang sini nga mapriso kag indi na makagwa apang indi sini gusto nga patyon bangod bisan ano ang matabo ini gihapon ang iya iloy.
Nagtulo naman ang luha sang halos kadam-an sa mga nakabati sa sabat sang bata.
