Sa tunga sang bag-o nga mga regulasyon sang China nga nagahatag sang gahom sa ila coast guard nga i-detain ang mga foreigners nga maakusahan sang trespassing sa West Philippine Sea, ginpanugyanan ni Armed Forces of the Philippines Chief of Staff General Romeo Brawner Jr. ang mga Filipino nga magpadayon sa pagpangisda sa area.
Suno kay Brawner, ang militar kaupod ang maritime law enforcement agencies, ang magaprotekta sa mga Filipino nga manugpangisda kadungan sa pagtake-effect sang anti-trespassing policy sang Beijing subong nga adlaw, Hunyo 15.
Ginmintinar sang AFP nga ang mga Filipino ang may kinamatarong nga magpangisda sa mga baybayon sa exclusive economic zone sang pungsod.
Suno diri, kaupod sang militar ang Philippine Coast Guard, Philippine National Police, Bureau of Fisheries and Aquatic Resources kag iban nga mga ahensya nga concerned.
Kaupod man nila indi lamang ang mga uniformed personnel kundi kasubong man ang mga manugpangisda nga amu gid ang apektado.
Suno sa iya, tanan ang apektado sini gani dapat nga magbuligay bangud isa ka pungsod ang dapat nga mag-address sang nasambit nga problema.
