BACOLOD CITY — Patay ang isa ka army corporal sa Guihulngan City, Negros Oriental matapos ginluthang sang ginapatihan miyembro sang New People’s Army kaina sang aga.
Ginkilala ang biktima nga si Corporal Rex Derramas, 38-anyos, residente sang Barangay Poblacion, Guihulngan City kag assistant patrol base commander sang Candalanon CAFGU Active Auxiliaries sa Barangay Trinidad.
Sa interview sang Bombo Radyo Bacolod sa imbestigador sang Guihulngan PNP na si PO2 Marlon de Asis, nagpaninda sang ila suplay sanday Derramas kag CAFGU nga si Jojo Sandot sa Sitio Casingan, Barangay Trinidad, mga alas-8:30 kaina sang aga.
Samtang sakay sang motorsiklo, ginpaulanan sila sang bala sang ginabanta tatlo tubtob lima ka mga suspetsado.
Nakaangkun sang madamo nga igo sa lawas si Derramas nga gintunaan sang iya gilayon nga kamatayon.
Nakasalbar naman si Sandot matapos nakalikaw ang motorsiklo.
Suno sa imbestigador, ginapatihan nga mga miyembro sang Special Partisan Unit sang NPA ang nagpatay sa army corporal.