Nagpasalig ang assistant city engineer sang Bacolod nga amat-amaton na sang mga ini kuha ang construction waste materials nga gintambak sa school oval sang Bacolod City National High School.
Sa interview sang Bombo Radyo Bacolod kay Engr. Leuben Seballos, bangud sa malain nga panahon wala sang mga ini gilayon makuha ang mga construction waste materials nga natambak sa oval sang nasambit nga eskwelahan bangud kun nagapadayon ang pag-ulan mahumok ang duta, mahimo nga magguot ang mga truck nga ginagamit sang mga ini.
Suno kay Seballos, ginhulat na lang nila nga mag-init kag magmaayo ang panahon agud nga mapadayon ang operasyon sa pagkuha sang mga gintambak nga construction waste materials sa oval sang BCNHS.
Nagpasalig man ini nga sige-sigehon ang pagkuha sang gintambak tubtob nga maubos kag magamit na sang eskwelahan ang school oval.
Ginpahayag man sini nga nagakabaton naman sila sang sulat nagikan sa Bacolod City National High School angot sa concern.
Ginabanta sang assistant city engineer nga duha ka bulan antes maubos hakot ang construction waste materials sa BCNHS oval.
