Preparado na ang Team Azkals sa pagsabak sa 2022 FIFA World Cup Qualifiers batok sa Team Syria sa ciudad sang Bacolod subong nga Huwebes.
Sa ginpatigayon nga press conference kahapon, ginpahayag sang team Azkals nga handa na sila nga atubangon ang team Syria karon sa Panaad Park and Stadium.
Suno sa Assistant coach sang Azkals nga si Scott Cooper, aminado ini nga indi madali ang preparasyon nga ila ginhimo apang ila himuon ang tanan agud maangkon ang kadalag-an batok sa Syria.
Suno kay Cooper, mabaskog man ang Syria kag indi dali-dali nga patumbahon bangod ang mga players sini ang dalagko.
Apang base sa eksperyensya sang Azkals suno kay Cooper, kumpyansa ini nga masarangan sang Azkals nga pierdihon ang Syria bangod mas madamo man sila sang nakahampang nga mas mabaskog pa diri.
Naghatag naman sang statement ang isa sa mga players sang Azkals nga si Stephan Schröck, kun sa diin iya gintawag nga talented kag outstanding squad ang team Syria apang aminado man ini nga sila ang preparado na agud atubangon ini para sa ila hampang nga patigayunon karon.
Apisar nga mabaskog kag mapagsik ang Syrian players, kumpyansa ini sa gihapon nga ila malutos ang nasambit nga team.
Magluwas sa team Philippines, naghatag man sang statement ang team Syria tuhoy sa hampang nga patigayunon karon para sa FIFA World Cup Qatar 2022 kag Asian Cup China 2023.
Suno sa coach sang team Syria nga si Fadjar Ibrahim, sila ang nagalaum sang maayo kag matawhay nga hampang sa tunga nila sang Azkals.
Suno kay Ibrahim, sila ang nagtraining gid sang husto bangod wala nila ginakabig nga lango-lango nga kontra ang Azkals.
