May mga tawo gid sa kalibutan nga tuman ka diskartidor kaangay lamang sang isa ka babayi sa China nga guilty sang pagpanunto ang nakalikaw sa iya lima ka tuig nga sentensya.
Paano?
Suno sa report, ang babayi nga ginkilala lamang kay Chen Hong ang gin-convict sa kaso nga fraud sang Disyembre 2020 sa Shanxi province.
Apang, nakalikaw ini sa pagserbe sang iya sentensya bangud nga nagbusong ini sang tatlo ka beses sa masobra apat ka tuig.
Sa China, ang mga indibidwal nga may penalidad nga pagkapriso ang mahimo nga magserbe sang ila sentensya sa gwa sang bilangguan kun may seryoso sila nga medical conditions, nagabusong ukon may lapsag, ukon ang mga indi na makasarang nga mag-atipan sang ila kaugalingon.
Apang kinahanglan pa ang approval nagikan sa korte, kag kun pasugtan, ipaidalom sila sa istrikto nga supervision sang ila community correctional institutions.
Nagwa man sa imbestigasyon nga ginhatag ni Chen ang iya bag-ong bun-ag nga ikatatlo nga anak sa iya bayaw kag aminado man ini nga ginbulagan niya ang iya bana.
Nagapati ang local public prosecutor nga ginhungod ni Chen nga magpabusong agud nga makalikaw sa prison sentence.
Ginbalik man ini sa detention center sa baylo nga sa prisohan agud nga matapos ang iya jail term.
