May yara na sang Notice of Award nga ginhatag ang Bacolod City Water District (BACIWA) sa Prime Water Infrastructure Corporation para sa ila nga Joint Venture Agreement (JVA).
Ini santo sa isa ka pahina nga dokumento nga nakuha sang Bombo Radyo Bacolod nga napetsahan Pebrero 3, 2020 nga napirmahan ni Atty. Lorendo Dilag, chairman of the Board sa BACIWA.
Ang nasambit nga dokumento ang naka-address kay Engr. Romeo M. Sabater, Vice President sang Prime Water Infrastructure Corporation kun sa diin subject sini ang “Joint Venture Agreement for the Financing, Development, Improvement, Rehabilitation, Expansion, Operation and Maintenance of the Water Supply and Septage Management System of BACIWA).
Nasaad man sa sulat nga ginapanginbulahan ni Dilag ang kompaniya matapos nga na-kumpleto sini ang mga rekisitos para sa pagdihon sang JVA sa tunga nila sang water district.
Kasunod sini, ginpahayag ni Bacolod City Councilor Wilson Gamboa Jr., nga katapo man sang grupo nga Amlig Tubig nga mapatigayon sila sang rally.
Hiwaton ang rally sa Pebrero 24, halin alas-12:00 sang udto tubtob alas-2:00 sang hapon sa atubangan sang Bacolod Government Center.
Magluwas diri, maga-rally pa gid ang Amlig Tubig humalin alas-12:00 sang udto tubtob ala-1:00 sanga hapon sa pareho man nga adlaw sa atubangan naman sang BACIWA.
Suno kay Gamboa, tinutuyo sang ila protesta ang pag-angkun sang dayalogo kay Mayor Evelio Leonardia agud mahibaluan kun anu man ang iya nga tindog sa development sa tunga sang BACIWA kag Prime Water Infrastructure Corporation.
