Wala nagaupod si Bacolod Alliance of Commuters, Operators, and Drivers (BACOD-Manibela) President Rudy Catedral sa petisyon nga P10 fare hike para sa mga public utility Jeepneys.
Sa interview sang Bombo Radyo kay Catedral, mabug-at para sa mga ordinaryo nga mga mamumugon ukon mga pasahero ang P10 nga pagsaka sang plete.
Pasalig ni Catedral nga kun padayon nga mapanubo ang presyo sang gatong, indi sila magpasaka sang plete agud indi direkta nga mabudlayan ang mga pumuluyo.
Paathag sini nga ang grupo sang BACOD-Manibela ang nagaupod sa panindugan sang mga pasahero nga indi magpasaka sang P10 sa pletehan sa bilog nga Pilipinas.
Sa pihak nga bahin, ginpahayag ni Catedral nga lauman nga mabaton na nila sa subong nga semana P5,000 fuel subsidy para sa mga public utility vehicles.
Dugang pa sini, dako nga bulig ang amat-amat nga pagnubo sang presyo sang gatong.
Bangud suno diri, bisan papaano may maipauli sila nga ginansya sa ila nga pamilya.
Pahayag ni Catedral nga isa sila sa rason sa pagnubo sang fuel price paagi sa protesta rally nga ila ginapatigayon.
Nagpasalamat ini sa grupo nga nagapakita sa paghiliusa kag pagbuliganay agud mabatian ang ila nga mga singgitan.
