![](https://img.bomboradyo.com/bacolod/2019/12/DEBBIE-MAHINAY.png)
Bugal sang isa ka iloy sa ciudad sang Bacolod nga nakakuha sang silver medal ang iya anak sa dancesport sa 2019 Southeast Asian Games.
Si Debbie Mahinay sang Purok Mahimayaon, Zone 2, Brgy. Bata, Bacolod City ang nakakuha sang silver medal sa Breaking B-Girls Category sa competition nga ginpatigayon sa Royce Hotel sa Clark, Pampanga kahapon.
Sa interview sang Bombo Radyo Bacolod kay Heide Mahinay, iloy ni Debbie, apat ang iya kabataan — isa ang lalaki kag tatlo ka mga babayi.
Suno diri, mabuot nga bata ang dancer kag nagatudlo sadto sang subject nga MAPEH apang nakitaan na ini sang abilidad sa pagsaot sang Grade 2 pa lamang.
Malipayon ang iloy ni Mahinay nga nagdaog ang iya anak kag nalab-ot na sini ang iya handum.
Gintuad niya man nga sa iya nakasunod si Debbie nga maayo magsaot.
Sa pagkamatu-od suno sa iloy, nakalakat na ini sa China para sa contest kag nagdaog man ini bilang first runner-up.
Suno naman sa magulang ni Debbie nga si Donna Mahinay, close sila katama sang utod kag full support gid ang pamilya para sa handom sini kag excited na ang atleta nga makapauli kag makita ang iya iloy.
Gintuad man sini nga indi pa kuntani madayon ang paghampang ni Debbie sa SEA Games bangud may kulang sa grupo apang ini ang nakompleto duha ka adlaw antes ang SEA Games.
Si Debbie suno sa utod ang nagapatigayon man sang worskhops agud makatudlo man sa mga aspiring breakdancers.
Nagpanugyan man ini kay Debbie nga padayunon lang ang iya passion sa pagsaot kag pagtudlo.