Nagpasar sang resolusyon ang Sangguniang Panlungsod sang Bacolod nga nagapangayo sang impormasyon kag eksplinasyon gikan sa mga plano sang Negros Electric and Power Corporation (NEPC) tuhoy sa ila nga mga plano.
Sa interview sang Bombo Radyo Bacolod kay Councilor Jesus Claudio ‘Kalaw’ Puentevella, chairperson sang Committee on Energy sang Sanguniang Panlungsod, dapat maghatag sang paathag ang NEPC kun ano ang ila nga plano agud matapna na ang dugay-dugay nga unscheduled brownout kaangay sang natabo tinalikdan nga semana.
Kasubong man sang mga plano nila nga patigayunon sa transition.
Antes ang pagpirma ni President Ferdinand ‘Bongbong’ Marcos Jr. sang Republic Act 12011 sang Hulyo 26, una na nga ginpahayag sang NEPC nga sila ang magatake-over sa Agosto.
Sa karun ginahulat nalang nila ang sabat sang NEPC sa ila nga ginpadala nga sulat bangod ini man ang luyag mabal-an sang mga pumuluyo.
Ini ang dapat nga sabton man sang NEPC agud makahibalo ang mga member-consumers kun ano ang mga dapat lauman sa pag-operar sang bag-o nga power distributor.
Nagalaom man ang konsehal nga pamilyar na sa ciudad sang Bacolod ang NEPC bangod sila ang nagbulig naman sa Central Negros Electric Cooperative (CENECO) humalin sang tinalikdan nga tuig
Pahanumdom sini nga mataas ang ekspektasyon sang mga pumuluyo partikular na sa una na nga pasalig sang NEPC nga mapanubo ang power rates kag makahatag sang mas maayo nga serbisyo.
Pahanumdom pa ni Puentevella nga ang Bacolod City Council ang padayun nga magamonitor sa NEPC.
