Nagpasalig si Bacolod City Councilor Vladimir Gonzales sa mga opisyales sang Environmental Management Bureau kag Department of Environment and Natural Resources nga magacomply sa mga requirements antes magresume sa recovery sang iya nga property sa Purok Bayanihan, Barangay Banago diri sa ciudad.
Sang Huwebes, ginpatigayon ang technical conference kaupod ang regional director kag provincial office head sang Environmental Management Bureau.
Nagtambong man sa conference si Councilor Vladimir Gonzales kag tiglawas sang Barangay Banago.
Sa interview sang Bombo Radyo kay Joan Nathaniel Gerangaya, acting head sang Provincial Environment and Natural Resources Office, nagapasalamat ang PENRO kay Mayor Alfredo Benitez sa pag-issue sang cease and desist order agud nga mahatagan sang ligwa si Gonzales agud nga magcomply sang mga requirements base sa laws and regulations sa recovery sang property.
Plano sang konsehal nga idevelop ang duta nga minimal ang activity sang mga tawo kag magauna sa masobra isa ka hectare nga property.
Nagrequest naman ang PENRO nga magpatigayon sang demarcation sang property agud masiguro ang dulunan sang property matapos nga makasecure sang permits nga ginkompormehan man sang konsehal.
Gin-instruct sang PENRO nga ang private geodetic engineer nga ginhire ni Gonzales ang magapahibalo kun san-o masurvey sa property agud macountercheck sang geodetic engineer sang DENR.
Ang propiedad ang ginapanag-iyahan sadto sang mga Esteban kag duha ini ka titulo nga nagalapad sang masobra tatlo ka ektariya.
Suno kay Gerangaya, dapat nga isurvey anay ang property antes ang anuman nga activity agud nga indi maglaksam sa iban nga property.
