Ginatudlo sang Bacolod City Engineer’s Office ang halit sang Bagyo Paeng nga rason nga indi makalabay ang mga dump truck sang IPM Construction and Development Corporation sa dalan padulong sa sanitary land fill sang syudad sa Barangay Felisa.
Sa interview sang Bombo Radyo Bacolod kay Engineer Efraim Hechanova sang City Engineer’s Office, ang pagkaguot sang mga dump truck sang tinalikdan nga semana ang rason sang delay sa pagkolekta sang basura halin sang tinalikdan nga semana.
Suno kay Hechanova, subong mahimo na maagyan ang dalan padulong sa Barangay Felisa bangud natambakan na ini.
Ginpahayag man sini nga nagpadala na sila sang sulat sa Silver Dragon Corporation, ang tag-iya sang duta nga ginbaklan sang syudad agud nga himuon nga sanitary landfill nga sa madason nga semana magaumpisa na ang mga ini sa pagkay-o sang dalan.
Suno kay Hechanova, sang Marso 2022 may yara na ang syudad sang ginpain nga pondo nga P10 million agud nga magconstruct sang dalan.
Kinahanglan nga maumpisahan na ang pagkay-o sang dalan padulong sa sanitary landfill bangud sa problema sang pagkolekta sang basura sa syudad.
