16 ka mga balay ang nahalitan sa nagluntad nga sunog sa Purok Tahong, Barangay 2, Bacolod City pasado alas-2:00 kaina sang kaagahon.
Sa data nga ginpagwa sang Bacolod City Fire Station, ang nahalitan ang ginalakipan sang 16 ka pamilya ukon 35 ka indibidwal.
Ang origin sang sunog ang natumod naman nga gikan sa balay ni Marcelino Pitogo.
Nagdangat naman sa 500 square meters ang area nga ginlamon sang kalayo.
Sa interview sang Bombo Radyo Bacolod kay Punong Barangay Imelda Banguanga, gikan sa mga nasunogan, apat ang nakumpirmar sini nga renters.
Nakabatun man ini sang impormasyon nga sa balay nga wala sang kuryente kag nagagamit lamang sang kandila naghalin ang kalayo.
Una naman nga ginseguro sang Barangay ang makaon sang mga biktima, ang paghatag sang foodpacks kag nagpangayo man sa ciudad sang canopy kag folding beds para sa mga evacuees.
Suno kay Banguanga, ang mga nasunugan ang bag-o lamang nakabatun sang ayuda bangod nahalitan sang maglaslas ang Bagyo TINO, apang karun liwat naman nga nangatubang sang kalamidad. Samtang, aminado ang Bacolod City Fire Station nga may kabudlayan sa pagtumod sa rasun sang sunog nga nagluntad sa Prk Tahong, Brgy 2, Bacolod City.
Sa interview sang Bombo Radyo Bacolod kay Fire Officer 2 Paul Servano, spokesperson sang Bureau of Fire Protection – Bacolod, sang magluntad ang sunog gilayon nga nagresponder ang tanan nga available nga firetrucks sang Bacolod City Fire Station.
Natumod nila nga ang kalayo ang nag-umpisa sa ginaparentahan nga balay ni Marcelino Pitogo, kag gina-estaran ni Gerald Nacia.
Nagdangat naman sa P125,000 ang ginabanta nga balor sang kahalitan sang sunog.
Bangod halos human sa light materials ang mga pamalay, ang mga ini ang natupok gid kag na-abo, gani wala naman sang may makita nga fire patterns.
Ang mga residuals sang kalayo ang nawashout naman sa baybay.
Apang suno sa mga witnesses, mahimo nga kandila ang ginhalinan sang sunog bangod may porsyon sa lugar nga wala sang kuryente.
May mga impormasyon nga may nagluntad pa nga away sa mag-asawa nga naga-estar sa balay antes nag-ibwal ang kalayo.
Apang sa pihak sini, may nabatun man nga impormasyon ang BFP-Bacolod nga ang kuryente nga gikan sa poste pasulod sa tagsa ka mga balay ang nagabag-id sa mga atop.
Suno kay Servano, ini ang sarang man nga makatuga sang sunog.
