Nakabatun na sang madamo nga request ang Bureau of Fire Protection – Bacolod City para sa water rationing sa mga billeting area sa Negros Island Region Athletics Association Meet 2026.
Nahibaluan nga bwas, Marso 1 ang opening ceremony sang NIRAA Meet 2026 nga magatakop sa Marso 7.
Sa interview sang Bombo Radyo Bacolod kay Fire Insperctor Jemarie Tapiru, Deputy Fire Marshal sang Bacolod City Fire Station, kadungan sa opening, bwas man magasugod ang Fire Prevention Month.
Pahayag sini nga sumugod Marso 1 tubtob 31, ang Bureau of Fire Protection ang ginapaidalom sa Red Alert Status.
Suno kay Tapiru, madamo na sila sang nabatun nga request letter kag ang delivery sang tubig ang gin-umpisahan na subong nga adlaw.
May-ara man sang mga sources sang tubig sa kada billeting schools, apang ginalantaw nga ini ang kulangon bangod sa kadamuon sang mga atleta kag mahimo dulungan nga paghimos para sa mga sporting events.
Suno diri, ang mga magapatigayon sang water rationing amo ang mga fire stations nga malapit sa nagarequest nga billeting school.
Panugyan ni Tapiru nga magtawag lamang sa fire station agud maschedule ang delivery sang tubig.
Ini bangod sila ang nagapreparar man sang tubig pananglitan may magluntad nga sunog.
Luwas diri, sila ang magapahamtang man sang ambulance sa strategic location agud hapos nga makaresponder kun kinahanglan.
