Naghimo sang short term kag long term plans ang Bacolod City Government agud masolusyunan ang problema sa pagbaha sang ciudad.
Kahapon, nakighinun-anon si Mayor Alfredo Benitez sa Department of Public Works and Highways (DPWH), Disaster Risk Reduction Management (DRRMO), kag City Engineers Office (CEO) kaupod si Vice Mayor El Cid Familiarian.
Sa nasambit nga meeting, na-identify ang 22 ka mga problematic areas kun sa diin nagdangat sa 0.5 feet tubtob 2 feet ang run-off sang surface water.
Ini ang nagapatimaan nga wala nasarangan sang mga drainages ang kadamuon sang tubig ulan sa malapit isa ka oras, rason kun ngaa hinali lamang nga nagbaha.
Ang mga areas nga naapektuhan sang pag-ulan sang Lunes amu ang Hi-Strip; SM City, Brgy. 12; Burgos-Hilado St. ; Downtown Area; Gonzaga Subd., Brgy. Villamonte; Libertad Public Market; Central Market; Lacson-Hernaez St.; Rosario-Mabini St.; Gonzaga-Lopez Jaena; Luzuriaga-Gatuslao St.; Gonzaga-Mabini St.; Lopues East; Lupit River, Brgy.40; Mandalagan River (Near Queen of Mercy Hospital); Sta. Ana, Brgy. 31; J.R. Torres; Gatuslao-Hernaez St.; Mabini-Libertad St.; Hernaez St.; Magsaysay (Flyover); kag Magsaysay – Lacson St.
Bangud sini, nagdihon sila sang short term kag long term plans agud masolusyunan ang pagbaha sa ciudad.
Nalakip sa proposed short term plans ang pag-ilis sang manhole cover nga mangin steel grating type; declogging sang draining systems; pagpadako sang water inlets; pagpalapad sang opening sang mga catch basins; pagpatuman sang maayo nga hugot nga pag-implementar sang pagkuha kag paghaboy sang basura sa mga barangay; kag paghatag sang mga pahibalo sa mga stakeholders.
Para sa long term plan, ginapropose nga magabutang sang sang mga Diversion Channel, kun sa diin igarelease ang mga drainages sa areas.
Sa karun ang mga detalye sini ang padayon pa nga ginaplastar.
Nagahingyo ang alkalde sa mga pumuluyo nga mangin responsable sa paghaboy sang ila mga basura agud makabulig sa pagpahagan-hagan sang pagbaha sa ciudad.
