Nagpasar sang resolusyon ang Bacolod City Council nga nagarequest sa City Health Office nga ifacilitate ang implementasyon sang Konsulta Package sang Philippine Health Insurance Corporation (PhilHealth).
Sa interview sang Bombo Radyo Bacolod kay Bacolod City Councilor Celia Flor, chairperson sa Committee on Health and Sanitation sa Sangguniang Panlungsod, ang request sa CHO ang ginpaagi sa Office of the City Mayor.
Suno sa konsehal, madugay na ang Outpatient Benefit Package sa idalom sang Universal Healthcare Law, apang bisan ang PhilHeath ang aminado nga madutay lamang ang naga-avail.
Pahayag ni Flor nga sa opisina sini, kadam-an sang mga nagapangayo sang financial assistance ang para sa pagpakonsulta.
Apang madamo ang wala nakahibalo nga may Outpatient Benefit Package kag nagapinsar nga ang PhilHealth ang ma-avail lamang sang mga ma-admit sa ospital.
Sa Universal Healthcare Law, tanan nga Pilipino ang dapat marehistro kag maka-avail sang libre nga konsultasyon kag checkup kag selective laboratory kag diagnostic examinations kaangay sang CBC with platelet count, urinalysis, fecalysis, sputum microscopy, fecal occult blood, pap smear, ECG kag iban pa.
Suno diri ang CHO ang dapat mag-implementar kag magpahibalo angot sa serbisyo.
