Gin-athag sang pinuno sang Environment Sanitation Division sang Bacolod City Health Office nga wala sang may napatay sa ciudad bangud sa cholera apang may mga fatalities naman sang Gastroenteritis.
Ini matapos may mga nagwa sa social media nga mga pagpaandam matapos ginaalegar nga may nagtaliwan bangud sa cholera apang gin-athag ni Dr. Grace Tan nga ang ginatumod nga pasyente nga naconfine sa Corazon Locsin Montelibano Memorial Regional Hospital (CLMMRH) ang nadischarge pagkatapos sang lima ka adlaw.
Suno kay Tan, wala sang may napatay sa cholera apang may nagtaliwan bangud gastroenteritis nagikan sa Barangay Singcang Airport, Estefania kag Mansilingan.
Suno diri, iya pa sa karun ginapa-account kag ginapaimbestigahan kun significant ang numero sang kaso sang gastroenteritis kun ikumparar sa nagligad nga tuig.
Suno sa iya, isa sa mga rason sini amu ang maulanon nga tiyempo kag madamo man sang kaso sang nasambit nga balatian sa iban nga bahin sang pungsod.
Suno kay Tan, ang cholera naman ang kabahin sang mga food and water borne disease apang may impact man ang maulanon nga season.
Nagpanugyan ini nga dapat siguruhon nga maluto sang maayo ang mga pagkaon kag likawan ang mga raw ukon partially cooked, tsekyaron kun may mga permits ang mga water refilling stations, kag siguruhon nga matinlo ang mga bubon kun ini ang ginakuhaan sang tubig.
