Aminado si Bacolod City Lone District Representative Greg Gasataya nga indi na conducive ang Bacolod City Health Office gani kinahanglan na pangitaan sang lugar nga patindugan nga malapit sa sentro sang syudad agud nga mahapos matultulan sang mga pumuluyo nga nagakinahanglan sang medical attention.
Sa interview sang Bombo Radyo Bacolod kay Gasataya, long overdue na ang pagpatukod sang dako nga Bacolod City Health Office (BCHO) kag ang nahamtangan sini subong ang indi man mapalaparan bangud wala na sang lugar.
May yara kuntani sang proposal nga itupad ang BCHO sa tukuron nga Bacolod City General Hospital apang wala ini kumpormehan sang DOH.
Suno diri, ang Department of Health ang naghatag man sang budget para sa improvement sang city health nga P135 million para sa construction sang second floor sang city health office.
Suno kay Gasataya, dapat nga mapangitaan sang bag-o nga location ang Bacolod City Health Office kag magpangita sang pondo sa construction agud nga makahatag sang maayo nga serbisyo sa mga pumuluyo sang syudad sang Bacolod.
