Ginpatuman man sa ciudad sang Bacolod ang pagpasira sa tanan nga mga “piso net” station bilang pag-ugyon sa social distancing measure batok sa COVID-19 outbreak.
Suno kay Bacolod City Mayor Evelio Leonardia, kaupod nga ginpasir ang mga karaoke bars sa siyudad bangod sa posibilidad nga macontaminate sang coronavirus ang microphone nga pasa-pasa nga ginagamit sang mga kumalanta.
Kabahin naman sa negosyo, nagtawag ang bankers club of Negros Occidental kay Vice Mayor El Cid Familiaran nahanungod sa ila nga resolusyon.
Ang resolution number 2020-002 nga nagapahanugot nga mabuhinan ang oras sang operasyon sang ila miyembro nga bangko.
Dugang pa nga unod sang resolusyon ang pag-implementar sang “no mask no entry” policy, ukon ang pagbawal sa tanan nga wala sang ginasuksok nga mask nga magsulod sa mga miyembro nga bangko.
Suno sa resolusyon, ang operasyon sang bangko magasugod alas-9:00 sa aga kag magasira pag-abot sang ala-1:00 sa hapon.
Gilayon man nga ginpasugtan ang amo nga resolusyon sang alkalde kag bise alkalde sang siyudad.
Suno sa Mayor, reasonable ang amo nga resolusyon gani gilayon ini nga ipa-implementar.
