Nagpanawagan si Senator Imee Marcos sa Sugar Regulatory Administration (SRA) nga untaton na ang sugar importation bangud padayon nga naapektuhan ang mga lokal nga mangunguma sa manubo nga millgate price.
Suno kay Marcos, nagnubo sa 30 percent ang millgate price sang lokal nga kalamay bisan nga ginpahanugutan sang SRA ang importasyon apisar nga may supisyente nga supply sa pungsod.
Pahayag sang Senadora, may mga mangunguma nga nadulaan na sang P200 tubtob P400 per bag sang kalamay, apang wala naman nagnubo ang retail price sini sa merkado.
Suno diri, may ara naman sang ani kag indi kulang ang suplay apang naga-import sa gihapon ang SRA kag ginpamangkot kun sin-o ang makapulos sini.
Panindugan sini nga dapat untaton na ang padayon nga importasyon nga wala sang basehan kag direksyon ilabi na sa subong nga krisis, dapat ang mga mangunguma ang unahon kag indi ang imported.
Paathag ni Marcos nga dapat baklon sang pamunuan ang ani sang kalamay agud ma-stablize ang presyo kag malikawan ang oversupply.
