Ginapaandaman sang City Legal Office sang syudad sang Bacolod ang mga water refilling stations nga wala pa nagcomply sang mga requirements agud makakuha sang permit to operate.
Sa interview sang Bombo Radyo Bacolod kay City Legal Officer Atty. Carlos Romeo Ting Jr., may yara sang masobra sa 100 ka mga water refilling stations nga gindagdagan sang notice of voluntary closure agud mahatagan sang ligwa ang pagpaidalom sa water analysis bilang requirements agud makakuha sang business permit.
Suno kay Ting, nagalibot naman si Dra. Grace Tan, pinuno sang Environmental Sanitation Division sang City Health Office kag ang team sini agud nga magpatigayon sang water analysis.
Suno pa diri, sa tion nga indi magcomply ang masobra sa 100 ka mga water refilling stations sang mga requirements kaangay sang water analysis result agud makakuha sang business permit, mapilitan ang syudad nga ipasira nalang ini.
Nagpasalig ang chairman sang committee on health sa Sangguniang Panlungsod sang Bacolod nga nagapadayon ang monitoring sa mga water source kag water refilling stations kadungan sang pamahog sang cholera.
Sa interview sang Bombo Radyo Bacolod kay Councilor Kalaw Puentevella, padayon ang ila nga monitoring sa mga barangay sa syudad sang Bacolod ilabi na ang may yara sang cholera cases.
Suno kay Puentevella, sa ginpatigayon nga health board meeting sang syudad, gindiskusyunan ang pagbuligay sa padayon nga monitoring sang mga kaso sang balatian agud nga malikawan ang pagdugang pa.
Suno diri, isa man sa gin-istoryahan ang pagbutang sang chlorine sa mga water sources sang barangay kaangay sang mga bubon.
Nagacoordinate man ang barangay sa City Health Office para sa pagbutang sang chlorine sa water sources bangud man mahimo nga pagusto lang sa pagbutang sang chlorine bangud indi man maayo kun matam-an sa pagbutang sini.
Samtang antes pa man ang MassKara Festival, naglibot na ang City Health Office agud magpatigayon sang water analysis sa mga water refilling stations.
Aminado man si Puentevella nga madamo sang mga water refilling stations sa syudad nga wala sang business permit.
Nagpanawagan man ini sa mga tag-iya sang water refilling stations nga magcomply sa mga requirements agud nga makapadayon sa pagbaligya sang ginainom nga tubig.
Suno diri, ang hugot nga pagpacomply sang water analysis result sang mga water refilling stations ang pagpasiguro nga matinlo kag hilway nga imnon ang tubig nga ginabaligya kag ginagamit sang mga pumuluyo sang syudad.
