Nakasugod na sa pagpreparar ang syudad sang Bacolod sa palaabuton nga UNDAS 2022.
Suno kay Secretary to the Mayor Atty. Joseph Karol Chiu, nakasumiter na sang request para sa closure plan kag rerouting ang Bacolod Traffic Authority Office (BTAO).
Samtang may naplastar naman sila nga deployment plan kag nagrequest sang duty personnel gikan sa mga kapulisan.
Dugang pa ni Atty Chiu nga magapahamtang man sila sang mga ambulance sa nanarisari nga sementeryo nga sarang magamit enkaso may emerhensya.
Paathag sang Assitant to the Mayor nga ang guidelines nga ipatuman ang nasanto sa Inter-Agency Task Force (IATF).
Pahanumdom sini nga bisan ang National IATF ang nagpahanugot na sa indi paggamit sang face mask sa mga public open spaces kasubong man nagapahanugot sa 100 porsyento nga kapasidad sang makasulod sa sementeryo.
Wala naman ginadumilian sa pagsulod ang mga indi vaccinated sa COVID-19 vaccine.
Paathag ni Atty Chiu nga kun ila pa pagahugtan ang mga pumuluyo, ini ang paglapas na sa constitutional rights sa liberty sang publiko.
Bangod sini, magapabilin na lamang sa trapiko kag pagbantay sa posibilidad sang mga untoward incidents ang ila nga mangin trabaho sa maabot nga tigkalalag.
Samtang magaplastar man sang rescue teams ang Bacolod City Disaster Risk Reduction and Management Office (CDRRMO) sa nanarisari nga mga sementeryo sa syudad.
