Siguruhon ni Bacolod City Mayor Alfredo Benitez nga compliant sa health requirements kag protocols ang tanan nga nagabaligya sang pagkaon diri sa ciudad sang Bacolod agud masiguro man nga matinlo ang ila baligya.
Ini ang kasunod sang report nga may ulod na ang fried chicken nga balon sang Grade 4 pupil sa Montevista Elementary School kag ini ang ginbakal sang iya nga iloy sa cart sa Libertad Market.
Suno kay Benitez, naghatag na ini sang instruction sa City Legal Office nga magtukod sang enforcement team nga magaaddress sang issue.
Ini ang kaangay man sang ginhimo sa mga water refilling stations kun sa diin ginsiguro nga compliant ang mga ini kag ang non-compliant ang gin-issuehan sang closure order tubtub nga makacomply.
Naghingyo naman ini kay Councilor Celia Flor, chairperson sang committee on markets sa Sangguniang Panlungsod, nga magduso sang ordinansa nga magaregulate sang tanan nga ambulant vendors kun sa diin tanan sila ang dapat nga rehistrado.
Suno kay Benitez, ang tanan nga nagabaligya sang pagkaon nga ginakonsumo sang publiko ang indi exempted sa mga requirements sang mga food establishment kag ipaagi ini sa ordinansa.
Ang nasambit nga ordinansa ang ipatuman sang enforcement team nga tukuron sang City Legal Office.
Suno sa alkalde, igabutang sa ordinansa nga masakit ang pina sa sin-o man nga madakpan nga indi compliant kun sa diin sila ang magabayad sang mahal nga multa.
