Nakigsapol si Bacolod City Mayor Alfredo Benitez sa mga opisyales sang Central Negros Electric Cooperative agud istoryahan ang pila ka mga issue nga ginaatubang sang power distributor.
Madumduman nga sang tinalikdan nga adlaw, ginlunsyar ni Benitez ang online desk agud nga matipon ang mga reklamo sang mga Bacolodnon batok sa CENECO.
Suno kay CENECO general manager Ervin Stan Leo Ticar, ginpamangkot sang alkalde ang angot sa sporadic brownout apang ila ginpaathag nga 50 porsyento sang brownout ang indi tuga sang CENECO bangud yara pa ang National Grid Corporation of the Philippines.
Ginpamangkot man sang alkalde ang mataas nga rate sang kuryente kag sila ang nagpaathag man.
Ginplastar man sang CENECO officials ang pagtuon angot sa paggamit sang renewable energy bangud sila lang ang may long-term study para sa joint venture.
Suno kay Ticar, wala sila nagapabaya kag wala sang hocus pocus sa mga ginahimo sang CENECO bangud ang management kag Board of Directors ang konsumidor man.
Nagtambong man sa meeting ang chairman sang committee on energy sa Sangguniang Panlungsod nga si City Councilor Kalaw Puentevella.
