Gin-athag ni Bacolod City Mayor Alfredo Benitez nga wala ini nakahibalo nga may yara sang indi pag-intindihanay sa tunga nanday Vice Governor Jeffrey Ferrer kag Aurelio Gerardo Valderama nga gin-appoint ni President Bongbong Marcos bilang planters representative sa Sugar Regulatory Administration board.
Suno kay Benitez, wala ini sang ideya sa background ni Valderama kundi ginpahibalo ini nga siya ang gin-appoint sang presidente kag kinahanglan niya sang oath of office.
Suno sa alkalde, wala ini nakahibalo kun ngaa siya ang ginpili bilang maga-conduct sang oath of office.
Wala naman sang nakita nga malain ang alkalde kun sa iya nag-take oath si Valderama bangud isa man ini ka Negrense.
Pagkasunod nga adlaw, nakit-an sang alkalde ang post ni Vice Governor Jeffrey Ferrer batok kay Valderama.
Gintawgan ni Benitez si Ferrer agud mamangkot angot sa issue kag ginpahayag sang bise gobernador nga siya ang naprovoke sang sugar group.
Nagpanawag man si Valderama sa alkalde kag iya ini ginpanugyanan nga istoryahon ang bise gobernador agud nga masolbar ang issue.
Suno diri, dapat nga magmove forward kag magtrabaho na ang kada Negrense para sa kaayuhan sang tanan.
Suno sa local chief executive, ginatugyan na niya sa presidente ang pagpili kun sin-o ang nagakaangay nga ibutang sa pwesto.
