Ginkumpirmar ni Bacolod City Mayor Evelio “Bing” Leonardia nga nagpatigayon sila sang meeting kahapon kaupod ang Oxford-AstraZenica nahanungod sa COVID-19 vaccine.
Sa interview sang Bombo Radyo kay Leonardia, ginpahayag sini nga naghatag sang kondisyon ang AstraZenica nga magperma sang non-disclosure agreement kun sa diin indi dapat pag-idisclose ang ila gin-istoryahan lakip na diri ang presyo kag availability.
Suno sa alkalde, ang Oxford-Astrazenica ang isa ka non-profit nga kumpaniya kag wala sila nagalagas sang negosyo sa baligyaanay sang bakuna.
Lain man suno sa iya ang presyo sini kun ikumparar sa iban nga mga options kag iya ginpahayag nga tuman ka reasonable ang ila presyo.
Sarang man nga mastore ang bakuna sang nasambit nga kumpaniya sa 8 degrees storage kag mas convenient kun ikumparar sa iban nga brand nga nagarequire sang mas manubo nga degrees.
Ginalauman ni Leonardia nga sa ika-duha nga quarter pa man mangin available ang bakuna kag bangud indi supisyente ang doses nga makuha sang pungsod, dapat ekspektaron nga lain-lain nga brand ang pagagamiton.
Gindugang man sini nga nakaistoryahanay na sila ni Councilor Renecito Novero, naistorya na sini si Councilor Renecito Novero kag ginpahayag nga kinahanglan nila pungkuan kag diskusyunan ini kaupod ang business sector.
Ginpasalamatan man sang alkalde ang chairman sang Bombo Radyo Philippines nga si Dr. Rogelio Florete bangud sa inisyatibo sini nga paghatag sang bakuna sa mga empleyado sang estasyon.
Bangud sa ini nga tikang, suno sa iya, damo na ang maganyak nga magsunod sa iya kag himuon nga ehemplo agud magbulig sa pungsod sa pagpakigbato batok sa COVID.
