Ginalantaw sang pinuno sang Bacolod City Police Office nga mahimo nga may problema sa sulod sang Aki Cuadra Robbery Group gani sila man mismo ang nagapatyanay.
Madumduman nga si Donald Joseph Casiano ang nagbisita sa balay sang mga Rafols sa Purok Sigay, Barangay 2 antes ini ginpatay sang Miyerkules sang gab-i.
Ang magpakaisa nga Jhundelle kag Leonil Rafols ang kaupod sang lider sang grupo nga si Aki Cuadra nga gin-abduct sa Barangay Vista Alegre sang Enero 8 kag ginpatay sa Barangay Blumentritt, banwa sang Murcia.
Sang yara sa balay sang mga Rafols suno sa Bacolod Police Station 2, nagluntad ang indi pag-intindihanay sang mga miyembro sang grupo gani ginsunod sang suspetsado si Casiano kag gintiro samtang pakadto sa iya nga salakyan.
Sa interview sang Bombo Radyo kay BCPO director Police Col. Thomas Joseph Martir, wala pa sang suspetsado nga natumod sa krimen kag padayon pa ang imbestigasyon sang Police Station 2 angot diri.
Ginalauman naman nga mapaenhance ang footage sang CCTV camera nga nakacapture sa mga suspetsado.
Suno kay Martir, indi malayo nga mismo ang nabilin nga miyembro sang robbery group ang nagainaway kag nagapatyanay.
Sa karon, wala pa naaccount kun pila pa ang nabilin nga miyembro sang Aki Cuadra Robbery Group nga naga-operate sa ciudad sang Bacolod. Samtang, igamonitor sang Bacolod City Police Office ang tanan nga armed groups sa ciudad agud nga sila ang maaccount subong nga nagahilapit ang eleksyon sa Mayo 9.
Sa interview sang Bombo Radyo kay BCPO director Police Col. Thomas Joseph Martir, mahimo nga wala na sang iban nga grupo magluwas sa Aki Cuadra Robbery Group apang padayon ang monitoring sang intelligence officers ilabi na nga nagsugod na ang election period.
Suno kay Martir, ginamonitor ang private armed groups agud malikawan ang violence samtang nagahilapit ang eleksyon.
Naghatag naman sang direktiba ang national headquarters angot sa pagmonitor sa mga private armed groups nga mahimo magkomiter sang krimen.
Suno sa BCPO director, mahimo nga may nabilin pa nga miyembro sang Aki Cuadra Robbery Group bangud nagatuhaw nga mga kaupod man mismo ni Donald Joseph Casiano ang nagpatay sa iya sa Purok Sigay, Barangay 2 sang Miyerkules sang gab-i.
Bisan patay na ang lider kag apat ka miyembro sang Aki Cuadra Robbery Group suno kay Martir, indi pa mahambal nga malinong ang Bacolod bangud booming ini nga ciudad gani padayon ang ila nga monitoring.
Ginpasalig naman sang BCPO director nga ginatinguhaan sang kapulisan nga masolbar ang dalagko nga krimen sa ciudad ilabi na ang serye sang pagpamatay.
