Nagdangat sa masobra sa P93 million ang balor sang suspected shabu ang nakumpiskar sang Bacolod City Police Office sa tuig 2024.
Sa interview sang Bombo Radyo Bacolod kay Bacolod City Police Office City Director Police Col. Joeresty Coronica, ang Bacolod City Police Office ang nakakumpiskar sang 13, 784.379 grams ukon kapin 14 kilograms.
Suno kay Coronica ang standard drug price amo ang P6,800 per gram kun sa diin ang nakumpiskar nga suspected shabu ang nagdangat ang balor sa P93,736,000.00
Suno diri, mas madamo ang nakumpiskar nga illegal nga druga sang tinalikdan nga tuig 2023 kun sa diin nagdangat ang standard drug price sa P95 million kun ipaanggid sa tuig 2024.
Ang naaresto sang BCPO nga mga drug personalities ang nagdangat sa 520.
Ginpahayag sang City director nga sa iya termino nagapati ini nga madinalag-on ang kampanya batok sa illegal nga druga apisar nga nagumpisa lamang ini sadtong July 23, 2024 kun sa diin humalin sadto nagtutok ang mga ini sa pagkampanya batok sa illegal nga druga gani madamo ang narecover.
Suno kay Coronica ang illegal nga druga ang indi dapat pagpabay-an bangud ini ang dako nga problema sang sosyodad bangud ang kalabanan nga krimen nga nagakatabo ang ginatuga ukon maangot sa paggamit ukon illegal drug activities.
Nagapanawagan man ini sa mga pumuluyo nga updan sagihapon ang kampanya sang mga otoridad batok sa illegal nga druga bangud paagi sa hugot nga kampanya batok sa illegal nga druga madamo man nga mga problema ang naadress.
Kaangay lamang sang mga shooting incidents nga nakita sang mga ini ang puno kag punta ang illegal drug activities kag mga kinawatay.
Nasiguro man sang BCPO Director nga madamo sang mga krimen ang natapna bangud madamo sila sang nasalbar nga mga pumuluyo nga malulong sa illegal nga druga paagi sa hugot nila nga kampanya.
