Nagpanugyan ang Bacolod city veterinary office sa publiko nga magpadala lang sang request letter sa ila talatapan agud nga ma-impound ang mga layaw nga ido sa ciudad.
Sa interview sang Bombo Radyo Bacolod kay Dr. Maria Aguida Trinidad Dela Torre, ginpahayag sini nga dapat padal-an sila sang request letter kun sa diin nakasaad ang pangalan sang naga-request, contact number kag kun sa diin nga lugar.
Kun mabaton na sang CVO ang request, gilayon nila ini nga ischedule for impounding.
Suno kay Dela Torre, nagapadayon karon ang ila kampanya para sa responsible pet ownership santo sa City Ordinance 544.
Pananglitan nga ma-impound ang ido kag may yara sang mag-claim nga owner, magabayad sila sang penalty nga P500 agud nga makuha ang hinuptanan nga ido.
Samtang, ginkumpirmar man ni Dela Torre nga nagapadayon karon ang ila house-to-house campaign nga pagbakuna sa mga ido batok sa rabies.
Suno sa iya, nauntat ini sang nagligad nga Marso bangud sa COVID-19 pandemic kag nagresume ini sang Nobyembre 2020.
Sa karon, nada-double time sila agud nga magbalik sa normal ang ila nga schedule.
Suno kay Dela Torre, sini nga Enero 11 tubtob 15, naka-schedule sila nga magpangbakuna sa Barangay Alangilan; Enero 18 tubtob 26 sa Barangay Estefania kag sa Enero 27 onwards naman sa Barangay Granada.
