Gin-athag ni Bacolod City Vice Mayor El Cid Familiaran nga gin-aprubahan sang Sangguniang Panlungsod ang resolution of no objection (RONO) para sa ginapropose nga reclamation project ni Councilor Vladimir Gonzales.
Madumduman nga ginpablotter ni Punong Barangay Ricky Mijares si Gonzales bangud naguba ang ginhimo nga boulevard para sa shoreline protection kun sa diin una ang barangay ang nagpatampok kag ginbuligan man sang syudad sang Bacolod.
Suno kay Mijares, natural lamang nga ipablotter sini ang isa ka konsehal bangud naguba ang propiedad sa Barangay Banago nga ginapanag-iyahan sang ciudad agud nga may yara ini sang ipakita sa tion nga pangitaon ini sang gobyerno.
Sa interview sang Bombo Radyo kay Familiaran, ginpahayag sini nga naghatag sang RONO sang Sangguniang Panlungsod sa session tatlo ka semana na ang nakaligad.
Suno sa bise-alkalde, ang RONO ang nagapatimaan nga wala sila naga-object sa proyekto sang konsehal apang ang may diber lamang nga mag-aprubar sang proyekto amu ang Philippine Reclamation Authority.
Suno sa iya, sa PRA magapasa sang requirements si Gonzales kag nalakip lamang diri ang RONO.
Suno diri, dapat may yara sang konsultasyon sa mga stakeholders kag ideally, ini ang magagikan sa barangay agud may pagbaton sang komunidad.
May yara naman sang patigayunon nga public hearing si Mijares sa Setyembre 8 apang ini ang wala sang kaangtanan sa issue sa reclamation kundi tuhoy sa lain nga proyekto.
Gin-athag man sang bise-alkalde nga bilang presiding officer, siya ang naga-preside lamang sang session kag wala man ini nagaboto.
Wala man ini sang may ibreak nga tie tuhoy sa paghatag sang RONO sa proyekto ni Gonzalez bangud ini ang gin-aprubahan sang majority.
