Maga-request ang Bacolod City Government sang liwat nga pagpatigayon sang joint water resampling sa sanitary landfill upod ang Environmental Management Bureau-Negros Island Region (EMB-NIR) agud maverify kag ma-clarify ang findings ukon resulta sang test sa tubig sa suba sa Barangay Felisa, Bacolod City nga nagakonekta na sa Barangay Dulao, Bago City.
Suno sa pahayag ni Bacolod City Administrator Atty. Mark Steven Mayo nga wala ang ciudad nagaduda sa resulta sang test nga ginpatigayon ukon ang water sampling sang EMB-NIR apang luyag lamang sang City Government nga may yara sang transparency kag masunod ang insakto nga proseso sa pag-test sang tubig.
Madumduman nga gindagdagan sang Notice of Violation ang Bacolod City Government angot sa clean water act matapos nga mag-check ang nasambit nga ahensya sa tubig nga gin-alegar gin-agyan sang tagas nga naghalin sa sanitary landfill.
Suno kay Mayo sang July 9 may yara sang inspection nga ginpatigayon ang EMB NIR kag wala nakahibalo ang ciudad kun sin-o ang mga nag-upod sa nasambit nga inspection.
Suno pa diri nga kun may yara sang patigayunon nga kaangay nga inspection dapat may yara sang representative nagikan sa Bacolod Environment and Natural Resources Office (BENRO) kag Bacolod City Health Office para matumod ang mangin resulta.
Suno kay Mayo luyag sang Bacolod City Government nga magpatigayon sang joint water resampling upod ang EMB-NIR bangud ang ciudad bukas sa kaangay nga aktibidad.
