Naghingyo si Bacolod City Mayor Evelio Leonardia sa Commission on Elections nga iexempt sa election ban ang mga priority projects nga iga-implementar sang city government.
Suno kay Leonardia, nagsumiter na sila sa Comelec sang listahan sang priority projects apang respetuhon man sang alkalde ang desisyon sang poll body.
Madumduman nga naka-issue na ang ciudad sang notice to proceed sa winning bidders sang mga priority projects magluwas lamang sa Bacolod MassKara Coliseum nga nagabalor sang 800 million pesos bangud nagapadayon pa subong ang bidding.
Sang damlag lang, gindeklarar sang Bids and Awards Committee ang Jejor’s Construction Corporation bilang single lower calculated bidder para sa construction sang coliseum.
Ang iban naman nga priority projects amo ang development sang Progreso Village Relocation Site nga balor P350 million; Bacolod City College site development and facilities nga balor P350 million; kag ang construction of roads and bridges nga balor P200 million.
Ini ang pagakuhaon sa P1.7 billion loan sang city government sa Development Bank of the Philippines.
Kadungan sini, gin-anunsyar sang alkalde nga may museum nga patindugon sa tupad sang coliseum nga tukuron sa duta nga igadonar sang Yanson family.
Ang amo nga museum ang pondohan sang national government.
Date of airing: April 5, 2019
