Nagapadayon ang imbestigasyon sang Bacolod Police Station 1 angot sa pagpatay sa barangay tanod sang Barangay 34 samtang nagapamunit sa baybayon nga sakop sang Barangay 35, Bacolod City, kahapon.
Ang biktima ang ginkilala nga si Nilo Payo, residente sa Purok Million Flower, Barangay 34, Bacolod City.
Si Payo ang nakaangkon sang igo sang bala sa likod malapit sa tangkugo kag isa sa hawak.
Sa interview sang Bombo Radyo Bacolod kay Police Major Ramil Sarona, station commander sang Bacolod Police Station 1, ginalantaw nga personal grudge ukon pagdumot ang motibo sa pagtiro sa biktima bangud may nakaaway ini sang tinalikdan nga semana.
Suno kay Sarona, close range ang pagtiro kay Payo kun sa diin ginpanaugan ini sang suspect sa sea wall kag gintiro.
Napuhag man ang mga kaupdanan sini nga nagapamunit sang ini ang gintiro sang wala makilal-an nga suspetsado.
Suno sa station commander, duha lang ang naghimo sang krimen samtang ang duha ka iban pa ang naghulat lamang kag ginalantaw nga nagdrive sang motorsiklo nga ginsakyan sang mga suspek agud magpalagyo.
Samtang halangpon naman ang nangin pahayag sang asawa ni Nilo Payo.
Suno kay Veronica Payo, may yara sang nakalalis ang biktima sang nakaligad nga bulan kag ang ginhalinan nga napatay ang suga samtang nagakaon pa ang biktima.
Santo sa aligasyon sang asawa, nagpadala sang P5,000 ang anak sini nga si Marites para sa kuryente bangud nagatap lamang ang mga ini sa ila pakaisa nga si Alberto Alba.
Pahayag ni Payo, wala nanugid si Alba sa bana sini nga may yara sang ginpadala nga kwarta ang ila anak nga para sa suga.
Suno diri, sang nagakaon ang bana sini hinali lamang nga napatay ang suga kag rason sadto ni Alba nga napatay bangud sa ilaga.
Ini man ang ginhalinan sang pagbaisay sadto ni Alba kag sang biktima apang ini ang naareglo man sa barangay.
Wala man sang rekord sa barangay ang biktima kag ini ang nagatrabaho man bilang barangay tanod.
Ginpahayag man ni Payo nga ang nakalalis sang bana sini ang naghalin na sa ila lugar.
Wala man ini magdumdum nga ulihi na sini nga makita ang iya bana kahapon.
Aminado man ini nga napriso man ang bana sini pila na katuig ang nakaligad kag naserbehan naman sini ang iya sentensya sa New Bilibid Prison.
Una man sini nga gindumdom nga nastroke ang bana sini samtang nagapamunit bangud nagasuprer man ini sang high blood kag nagainum man sang maintenance.
Naplastar na ang bana sini kag natalana nga ihamyang sa ila balay.
Suno diri, kun sin-o man ang naghimo sa iya bana ang karmahon kag nakahibalo man ini nga mahibaluan man sa ulihi kun sin-o ang nagpatay sa iya bana.
