Ginalantaw nga malapit nalang nga matumod ang suspect sa pagpatay sa 12 anyos nga isa sa abductor sang 5 anyos nga bata nga babayi gikan sa Talisay City sa Locsin-Cuadra Street, Barangay 12, Bacolod City sang Hulyo 13.
Madumduman nga ang biktima nga si Dean Rod kag si Alias Macoy, 18 anyos ang nag-abuct sa 5 anyos nga si Danica gikan sa Talisay City sang Hulyo 1 kag narecover sa ciudad sang Bacolod sang Hulyo 2.
Si Macoy ang naaresto sa Talisay City Police Station kag ginpasakaan sang kaso nga abduction, samtang si Dean Rod ang ipaidalum pa kuntani sa neurological test bangod ini ang ginapahayag may deperensya sa paminsaron kag nagababy talk pa kun maghambal.
Apang sang Hulyo 12, ini ang gina-alegar ginkastigo sang grupo sang mga rugby boys kag sang Hulyo 13 kapin alas-2:00 sang kaagahon, hinali na lamang ini ginpalapitan sang suspect samtang nagatulog sa kilid sang dalan kag ginluthang sa ulo.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, may isa ka persona nga nasugid ang iloy sang biktima nga namensyonar sadto sa iya ni Dean Rod nga parehas man sa persona nga ginsugid ni Macoy samtang yara sa prisuhan.
Apang sa karun indi pa nila mabuyagyag ang identity sini sa kahanginan bangod padayun pa ang ila monitoring kag validation.
Suno kay Bonilla, ginalantaw ang posibilidad nga ginpahipos sang suspect ang biktima agud indi na sini masugid ang iban pa nila nga mga illegal nga buluhaton.
Ang person of interest ang natumod nga may mga record naman sang pagpangawat sa iban nga Police Stations sa Bacolod City kasubong man sa gwa sang ciudad.
Ginpadulungan naman sang mga kapulisan ang mga lugar nga ginpahayag ni Macoy nga ginapulian sang person of interest apang tubtob sa karun ini ang wala pa nila makit-an.
