Ginkumpirmar sang station commander sang Bacolod Police Station 9 nga may yara na sang naplastar nga security plan ang Bacolod City Police Office (BCPO) para sa fiesta minatay.
Sa interview sang Bombo Radyo Bacolod kay Police Capt. Rondyl Tapang, plastado na ang security plan kag may yara na sila sang deployment sang mga kapulisan agud nga magbantay sa mga patyo nga nasakupan sang area of responsibility sang Bacolod Police Station 9.
Suno kay Tapang, may yara na ini sang inisyal nga walk through survey nga ginpatigayon sa mga sementeryo kag may yara man sang coordination nga ginpatigayon sa mga in-charge sa patyo.
Suno diri, sa kada sementeryo may yara sang apat ka mga kapulisan nga igadeploy para sa pagpabilin sang kalinong kag katawhay samtang ginaselebrar ang fiesta minatay.
Nagpahanumdom man ini nga ginadumilian nga magdala sang mga matalom nga bagay, mag-inum kag magpatukar sang matunog nga musika sa sulod sang sementeryo.
Nagpanawagan man ini sang kooperasyon sang mga pumuluyo agud nga mangin madinalag-on ang pagpatuman sang security plan samtang ginaobserbar ang All Souls kag All Saints Day.
