Preparado na ang safety kag security measures sa Bacolod-Silay Airport sini nga Semana Santa para sa mga pasahero nga pa-gwa kag pasulod sa probinsya.
Sa interview sang Bombo Radyo Bacolod kay Police Major Deejay Domingo, Chief sang PNP Aviation Security Group Bacolod-Silay Airport Police Station, plastado na ang tanan para sa seguridad sang mga pasahero sa pagpanguna sang Civil Aviation Authority of the Philippines (CAAP).
Ginpahayag ni Domingo nga nakaplastar na ang ila preparasyon upod ang kapulisan para sa mga incoming kag outgoing nga pasahero.
Apisar ma-diutay pa sa karon ang volume sang biyahero, ginapaabot nga madagsa ini sa masunod nga mga inadlaw bangod may mga trabaho pa ang iban.
Suno diri, strikto gid ang pagtsekyar sang mga bagahe sang kada isa agud malikawan nga makapasulod sang mga kontrabando ukon mga armas.
Panawagan ni Domingo sa publiko, magkooperar gid kag magsunod sa mga pagsulondan sang airport agud mangin matawhay ang boarding.
Ginpahayag man ni Domingo nga may yara sang tatlo ka ahensya sang gobyerno ang maga monitor sa Bacolod-Silay Airport nalakip diri ang CAAP, PNP, kag Office for Transportation Security (OTS).
Yara man ang Bureau of Fire Protection (BFP) kag Silay City Rescue para sa medical assistance.
Ginapahanumdom ni Domingo sa tanan nga maga-gamit sang airport sini nga semana santa nga magsunod gid sa security protocols kag indi magdala sang mga ginadumilian nga butang agud malikawan ang aberya sa bIyahe.
