Dako ang pag-pasalamat sang bag-o nga alkalde sang syudad sang Himamaylan sa tanan nga mga pumuluyo nga naghatag sang suporta kag bulig sa Alyansa Toga ukon Tongson-Gatuslao tandem.
Sa interview kay incoming Himamaylan Mayor Raymond Tongson, apisar mabaskog nga pader ang nakasumpong sini, mas ginpili sa gihapon sang publiko nga siya ang ibutang sa pwesto bilang bag-o nga amay sang syudad.
Gin-eliher man bilang bag-o nga bise-alkalde sang syudad ang running mate sini nga si anay SP member Justin Gatuslao.
Ginpahayag man sini nga ang ila kadalag-an ni Gatuslao kag sang iban pa nga mga kaalyado nila sa konseho ang indi lang para sa ila “personal goal”, kundi para sa tanan nga mga taga-Maylan.
Suno kay Tongson, bilang isa ka amay, dapat nga hatagan gid sang pagtamud ang kinahanglanon sang iya mga pumuluyo.
Apisar nga indi man tanan sa ila ang nakasulod sa konseho, luyag sini sa gihapon nga mag-ugyon ang tanan para sa ika-uswag sang ila pinalangga nga Himamaylan.
