Nagbaskog na ang Bagyo Crising sa Tropical Storm category kaina alas-2:00 sang kaagahon samtang nagahilapit sa Northern Luzon.
Ang bagyo ang ulihi nga nasiplatan sa 335 km sa nasidlangan sang Echague, Isabela ukon 325 km sa nasidlangan sang Tuguegarao City, Cagayan.
Dala sini ang hangin nga may kabaskugon nga nagadangat sa 65 km/h kag pagmadlos nga tubtob 80 km/h.
Ang Bagyo ang nagahulag sa Northwestward nga dereksyon sa kadasigon nga 20 km/h, ini ang ginalantaw nga magapabilin sa banas sa masunod nga 11 oras.
Ini ang ginalantaw nga magasanyog pa tubtob magdangat sa Severe Tropical Storm category bwas sa aga ukon sa hapon.
Ginpaidalom na sa Tropical Cyclone Wind Signal no. 2 ang Batanes, Cagayan kalakip ang Babuyan Islands, northern kag eastern portions sang Isabela, Apayao, naaminhan nga bahin sang Kalinga, naaminhan nga bahin sang Abra, Ilocos Norte, kag naaminhan nga bahin sang Ilocos Sur.
Yara naman sa Tropical Cyclone Wind Signal no. 1 ang nabilin nga bahin sang Isabela, Quirino, Nueva Vizcaya, nabilin nga bahin sang Kalinga, Mountain Province, Ifugao, nabilin nga bahin sang Abra, Benguet, nabilin nga bahin sang Ilocos Sur, La Union, naaminhan nga bahin sang Pangasinan, naaminhan nga bahin sang Aurora, naaminhan nga bahin sang Nueva Ecija, Polillo Islands, Camarines Norte, Catanduanes, kag naaminhan nga bahin sang Camarines Sur.
Subong nga adlaw, mabatyagan ang mabulubagyuhon nga panahon sa Batanes, Cagayan, Isabela, Apayao, Abra, Kalinga, Ilocos Norte, kag Ilocos Sur bangod sa Tropical Storm Crising.
Mangin maulanon man nga may kaupod nga mabaskog nga hangin sa Aurora, nabilin nga bahin sang Ilocos Region, nabilin nga bahin sang Cordillera Administrative Region, kag nabilin nga bahin sang Cagayan Valley bangod gihapon sa Bagyo.
Samtang mangin maulanon man sa Zambales, Bataan, MIMAROPA, diri sa atun sa Negros Island Region, kag Western Visayas, apang ini ang tuga naman sang Southwest Monsoon ukon Hangin Habagat nga ginpabaskog pa sang bagyo.
Lapta-lapta nga mga pag-ulan naman ang mabatyagan sa Metro Manila, Zamboanga Peninsula, Cavite, Laguna, Batangas, Rizal, kag nabilin nga bahin sang Central Luzon tuga sang Habagat.
Mangin magal-umon nga magatuga sang lapta-lapta nga mga pag-ulan nga may kaupod nga pagpangilat kag pagpanaguob naman sa Bicol Region, Northern Samar, kag Quezon nga epekto sang Trough ukon extension sang Tropical Storm Crising.
Ang nabilin nga bahin sang Visayas kag Mindanao ang makaeksperyensya naman sang magal-umon nga kalangitan nga may lapta-lapta nga pag-ulan kag thunderstorms bangod naman sa Habagat.
