Liwat na nga nagbaskog sa Typhoon category ang Bagyo OPONG alas-2:00 kaina sang kaagahon samtang yara sa West Philippine Sea.
Samtang nabatak naman ang Tropical Cyclone Wind Signals sa Bacolod City kag Negros Occidental halin alas-8:00 kagab-i.
Ang sentro sang Typhoon OPONG ang ulihi nga nasiplatan 505 km nakatungdan sang Indang, Cavite.
Dala sini ang kabaskugon sang hangin nga nagadangat sa 120 km/h kag pagmadlos nga tubtob 150 km/h.
Ang Bagyo ang nagahulag padulong sa West Northwestward nga dereksyon sa kadasigon nga 30 km/h.
Sa karun, Luzon na lamang ang napaidalom sa Tropical Cyclone Wind Signal no. 1 nga ginalakipan sang:
-Nakatungdan nga bahin sang Pangasinan
-Zambales
-Bataan
-Nakatungdan nga bahin sang Cavite
-Nakatungdan nga bahin sang Batangas
-Naaminhan nga bahin sang Occidental Mindoro kalakip na ang Lubang Islands kag Calamian Islands
Ang Southwest Monsoon ukon Hangin Habagat nga ginpasanyog pa sang Bagyo OPONG, ang makatuga sang makusog nga bulyada sang hangin partikular na sa mga coastal kag upland areas sa Luzon.
Sa atun nga track forecast, ginalantaw nga magagwa na sa Philippine Area of Responsibility (PAR) ang Typhoon OPONG subong nga aga ukon karun sa hapon.
Sa paggwa sa PAR, ini ang ginalantaw nga magahulag padulong sa west northwestward nga dereksyon padulong sa Northern Vietnam.
Ang Bagyo ang mahimo magbaskog pa samtang nagahilapit sa nasambitan nga pungsod.
Subong nga adlaw, lauman gihapon ang mga lapnagon nga pag-ulan nga may kaupod nga pagpangilat kag pagpanaguob sa Metro Manila, Ilocos Region, Central Luzon, CALABARZON, kag MIMAROPA tuga sang Trough ukon ikog sang Typhoon OPONG.
Amo man ang mabatyagan nga paniyempo sa Western Visayas, sa atun sa Negros Island Region, kag sa Zamboanga Peninsula, apang tuga naman sang Habagat.
Samtang mangin mainit kag mapaang na ang panahon sa nabilin nga bahin sang pungsod, magluwas sa mga makadali kag tumalagsahon nga mga pag-ulan nga dala sang Localized Thunderstorms.
