Nakuha sang Bailes de Luces dancers sang La Castellana ang top prize sa Wunjo Dynamic Dancing Carnival sa South Korea.
Setyembre 9, nagbalik na sa banwa sang La Castellana ang 20 ka mga Bailes de Luces dancers upod ang pila nila ka mga opisyales sa pagpanguna ni Mayor Rhumayla Nicor Mangilimutan matapos nakuha ang gold medal sa kompetisyon sa Wunjo City, South Korea sang Setyembre 3-8.
Ginlutos sang Negrense dancers ang anom ka iban pa nga mga pungsod sa special division foreign category sang kompetisyon.
Dako naman ang pagpasalamat ni Mayor Mangilimutan sa mga nagsuporta sa ila agud makapadulong sa luwas sang pungsod ang ila mga dancers ilabi na ang mga opisyales sang probinsiya.
Ginakalipay man sang alkalde nga natuman na ang iya handom nga makilala ang Bailes de Luces sa bug-os nga kalibutan.
Nahibaluan nga naghatag ang provincial government sang P500,000 para sa galastuhon sang delegasyon sa pagpamuno ni Governor Eugenio Jose Lacson kag subong man si Vice Governor Jeffrey Ferrer kag 5th District Congresswoman Marilou Arroyo.
Nagpauli ang Negrense dancers sang 5 million won ukon katumbas sang masobra P200,000 kag duha ka certificates.
Bangud sang ila kadalag-an, imbitado ang Bailes de Luces dancers sa Lantern Festival Competition sa Seoul, South Korea sa Mayo 2020 kag sa Hanoi, Vietnam sa October 2020.
