BACOLOD CITY — Bisan ang balay sang alkalde sang ciudad sang Bacolod ang wala man nakaluwas sa insidente sang sunog.
Apang sa pihak sini, nagpasalamat si Mayor Evelio ‘Bing’ Leonardia nga gilayon nga napalong ang kalayo kag wala na nagdako pa ang sunog sa ila balay sa Rosario Street, Barangay 39 kahapon sang hapon.
Suno kay Leonardia, manuglakat siya kuntani sa simbahan pasado las 5:00 sang hapon sang nagluntad ang sunog nga nagsugod sa kwarto sang iya utod.
Ang amo nga balay ang ginapanag-iyahan sang mga ginikanan ni Leonardia kag diri man sila naga-istar sang iya tiayon.
Sa inisyal nga imbestigasyon sang Bureau of Fire Protection, daan nga linya sang kuryente ang gintunaan sang kalayo.
Suno sa alkalde, tuig 1971 pa gintukod ang ila nga ancestral house amo gani nga daan na ang mga kahoy diri.
Nagapati naman si Leonardia nga wake up call ini para sa tanan nga bisan sin-o ang mahimo nga mabiktima sang sunog.
