Nakaplastar na humalin kagab-i ang mga nagabaligya sang ramos ukon lukay sa atubang sang San Sebastian Cathedral para sa Domingo de Ramos, subong nga adlaw.
Sa interview sang Bombo Radyo kay Merlinda Dapitan sang barangay Garanada, masobra 15 ka tuig na ini nga nagabaligya sang lukay sa atubang sang simbahan.
Suno diri, siya lamang ang nagtoon kun paano maghimo sang krus gamit ang lukay.
Suno kay Dapitan, nagabaligya ini sang ramos nga nagabalor sang P20 kag P25 samtang sa paglibot sang Bombo News Team iban ang pinakabarato nga ginabaligya nagabalor sang P10 samtang ang pinakamahal naman nagabalor sang P50.
Pahayag ni Dapitan, nagabakal sila sang paklang sa balor nga P50 kag sa paghimo sang krus gamit ang lukay mahimo na sila makaginansya sang kapin P100.
Samtang, ginpahayag naman ni Engelita Arciaga nga sa pagbaligya sang ramos ukon lukay bisan papaano may mapauli ini nga kwarta.
Suno diri, lima ka tuig na siya nga nagabaligya sang ramos kag wala man sang pagbag-o kun pila ang ila maginansya.
Suno pa kay Arciaga, wala man ini sang kapierdehan sa pagbaligya sang ramos.
