Gin-athag sang balo ni Ricky Serenio nga wala na nagbalik sa illegal drug trade ang iya bana.
Sa press conference nga ginpatigayon sang pamilya Serenio kahapon, ginpanindugan ni Jennifer Serenio, asawa sang self-confessed bagman sang Berya Drug Group, sumugod sang ginkustodiya si Ricky ni anay Pulupandan Mayor Magsie Peña, wala na ini nagbalik sa illegal drug trade.
Suno kay Jennifer, wala sang kamatuoran nga ang narekober nga listahan sa salakyan kun sa diin gintiro-patay si Ricky amo ang listahan sang mga tawo nga imbolbado sa iligal nga druga.
Paathag sini, listahan adto sang kapin 50 ka mga tawo nga ila ginapautang sa Pulupandan kag ciudad sang Bago.
Suno diri, may mga ginbaligya si Ricky nga propiedad, kasapatan kag furnitures kag dugang pa ang allowance gikan kay former Mayor Peña nga ila ginhimo nga kapital.
Magluwas sa pagpautang, nagabaligya man sila sang beauty products.
Ginkumpirmar man sini nga wala sang armas nga dala si Ricky sang ini ang ginpatay sa guwa sang Manville Royalle Barangay Pahanocoy, Bacolod City sang tinalikdan nga Agosto 31 sang hapon.
Samtang, nagbaliskad ang pahayag sang kaupod ni Ricky Serenio sang ini ang gintiro-patay sang riding-in-tandem suspects sa Manville Subdivision, Barangay Pahanocoy, Bacolod City tinalikdan nga Agosto 31 sa nangin una nga pahayag sang iya manghod.
Una na nga ginpahayag ni Mark John “To May” Serenio, manghod ni Ricky nga lalaki ang upod sang iya magulang sang ini ang ginpatay.
Dugang pa niya nga ini man mismo ang nagpahibalo sa ila nga ginluthang si Ricky.
Suno pa kay To May nga gin-arkilahan lamang ni Ricky ang salakyan nga gingamit sini.
Apang, sa press conference nga ginpatigayon kahapon, ginpahayag ni certain “Mae” nga siya ang upod ni Ricky sang natabo ang insidente.
Suno diri, kasosyo sila sang self-confessed bagman sang Berya Drug Group sa pagbaligya sang beauty products.
Ginkumpirmar man sini nga siya ang nagapanag-iya sang salakyan nga gingamit ni Ricky.
Ginpanginwala man ni “Mae” nga may milyones si Ricky.
Suno diri, ang kwarta ni Ricky ang iya ginpangabudlayan kag indi bangud nga nagbalik siya sa illegal drug trade.
Dugang pa ni Mae nga may yara sang lima tanan ka mga passbook sa salakyan kun sa diin ang isa ang iya mismo ginapanag-iyahan nga may unod nga 5 mil pesos, isa pa gid nga may unod nga 50 mil pesos nga ginapanag-iyahan sang utod ni Ricky, isa ka passbook para kay Ricky nga may yara sang 120 mil pesos, isa pa gid ka passbook nga may unod nga 5 mil pesos para sa salakyan nga ginahulugan ni Ricky kag passbook nga may yara sang 50 mil pesos nga ginapanag-iyahan ni Jennifer nga asawa ni Ricky.
Nagapamatuod ang pila ka mga persona nga wala na naga-imbolbar sa iligal nga druga ang self-confessed bagman sang Berya drug group antes ini ginpatay.
Suno kay Arthur Esturqo, manugbaligya sang fishball, isa siya sa mga ginapa-utang ni Ricky.
Suno kay Esturqo, magatestigo siya nga wala sang may ginahimo nga katontohan si Ricky sumugod sang nag-abot ini sa Pulupandan.
Dugang pa sini nga dako ang nabulig sang self-confessed bagman para sa iya nga negosyo.
Samtang, nakit-an naman sang isa ka manugbaligya sang isda nga dako ang pagbag-o ni Ricky.
Suno diri, nagapahimuyong na ang self-confessed bagman sa Pulupandan apang ginhingabot pa gid sang iban.
Makapamatuod man ini kun ano ka mabinuligon ni Ricky sa ila nga mga kubos.
Suno sa iya, mahapos lamang palapitan si Serenio.
