Nagadangat na sa kapin P39 million ang nangin halit sang pagbaha sa Northern Negros sa mga pananom kag palaisdaan matapos madugangan sang P21.5 million nga halit nga narekord sa nagluntad nga ikaduha nga pagbaha sang nagligad nga Enero 8, 2021.
Madumduman nga kabug-usan nga P17 million ang nangin halit sa pananom sa una nga pagbaha nga nagluntad sadtong Enero 1.
Sa interview sang Bombo Radyo Bacolod kay Provincial Agriculturist Atty. Japhet Masculino, ginpahayag sini nga P15 million ang narekord nga halit sa humay sa ikaduha nga pagbaha samtang P5.7 million naman ang nangin halit sa ulutanon ukon high-value crops kag P500,000 naman ang damage nga natuga sa palaisdaan.
Suno kay Masculino, magluwas sa mga lugar sa Northern Negros, nagpadala man sang report sang kahalitan sa humay ang banwa sang Valladolid.
Sa karon ila nalang ginahulat ang lista sang mga mangunguma nga pwede mahatagan sang bulig nagikan sa Department of Agriculture.
Iya naman ginmanduan ang mga city kag municipal agriculturist nga hikuton na ini sa mas madali nga panahon.
