Ginpahayag sang kampo ni Bamban, Tarlac Mayor Alice Guo nga sila ang magafile sang isa ka motion agud i-lift ang iya suspension.
Suno sa abogado ni Guo nga si Stephen David, ila pamatud-an nga indi makusog ang ebidensya kag wala gid sang ebidensya.
Madumduman nga sang Lunes, ginpaidalum sang Office of the Ombudsman si Guo kag pila ka mga opisyales sa Bamban sa preventive suspension sang tubtob sa anum ka bulan samtang pending pa ang resulta sang isa ka imbestigasyon natuhoy sa isa ka complaint nga ginfile sang Department of the Interior and Local Government natuhoy sa ginaalegar illegal nga mga aktibidad sa isa ka Philippine Offshore Gaming Operator complex sa ila nga banwa.
Suno kay Ombudsman Samuel Martires, ang suspension ang ginmando agud malikawan ang maskin ano nga impluwensya sa imbestigasyon.
Suno diri, makusog ang ebidensya batok kay Guo kag depende na ini sa alkalde kun paano pamatud-an ang iya kaugalingon.
Kun masapwan ini nga guilty, siya ang sarang nga mahukas sa pwesto.
Sa isa ka statement, ginpahayag naman ni Guo nga siya ang magakooperar sa mga otoridad.
