Patay ang bangkador sa peryahan samtang pilason naman ang duha ka iban pa matapos ginluthang sa besperas sang highlights sang kapiestahan sang Barangay Guimbalaon, Silay City alas-2:45 kaina sang kaagahon.
Ang gunman ang nakilala nga si Pedrito Penafiel, residente sa Hacienda Dolores sang nasambitan nga Barangay samtang ang biktima nga si Allan Tamparong, 34 anyos ang residente sa Barangay Payao, Binalbagan.
Sa interview sang Bombo Radyo Bacolod kay Julius Nibrea, bangkador sa peryahan, ang suspetsado ang yara sa impluwensya sang makahulubog nga ilimnon kag dako na ang pierde sini sa sugal.
Ini ang nagalibot sa nanarisari nga pwesto sa peryahan nagapangayo-kayo kag ginapahog ang mga bangkador pinaagi sa ginasukbit sini nga armas luthang.
Suno kay Nibrea, ginpangayuan siya ni Penafiel sang P500 apang bangod wala pa sila sang kwarta, gintanyagan nya na lamang ini sang P200.
Apang naakig ang suspect kag siya ang ginhambalan “gusto mo malupok ulo mo?”.
Apang ang suspect ang gintambagan pa sang iya kaupod kag ginpaduko si Nibrea.
Bangod sini nahimo nga makalikaw sang bata apang naigo naman ang iya pakaisa nga si Tamparong sa kilid, naigo sa abaga ang abyan sang suspetsado kag may isa pa nga nasalabat sang bala.
Gilayon ini nga nagpalagyo kag siya ang ginlagas pa ni Penafiel, tubtob nga nagbalik na lamang ini kag ginseguro ang pagpatay sa iya pakaisa.
Aminado si Nibrea nga tuman ang iya kahadlok sa natabo
