Magkaupod nga igalubong ang bangkay ni Queen Elizabeth II sa iya nga bana nga si Prince Philip sa Frogmore cottage, ang paborito nga garden sang reyna sa Windsor Castle.
Suno kay Bombo International Correspondent Ramil Isogon, derekta sa England, United Kingdom, nga magalibot ang prosesyon sang state funeral bwas sa mga dalanon sang London.
Isa man sa ginabantayan sa karun suno diri kun magasuksok sang military uniform ang apo sang reyna, nga sanday Prince William kag Prince Harry.
Ini bangod sang gindala sa Westminster Hall ang lungon sang reyna, ang duha lamang ang naka-ordinary suit samtang ang iban nga katapo sang royal family ang nakasuksok sang military uniform.
Maga-umpisa alas-6:30 sang aga ang state funeral kag natalana nga magtakop alas-7:00 sang gab-i.
Ini ang magatakop naman sa isa ka exclusive mass service para sa royal family sa sulod sang St. George’s Chapel.
Nahibaluan nga sa underground sang nasambit nga Chapel man nakahamyang ang bangkay ni Prince Phillip nga nagtaliwan sang Abril 2021 sa edad nga 99 anyos.
Gikan sa St. George’s Chapel ang mga lungon ang pagada-on sa Windsor Castle kun sa diin ang duha upod nga igalubong.
Paathag ni Isogon nga pangabay ni Queen Elizabeth nga hulaton ang iya nga pagtaliwan kag dungan sila nga ilubong sang iya nga bana nga luyag sang monarch buhaton sa paborito sini nga garden sa Frogmore cottage.
Nahibaluan nga 13 anyos pa lamang si Queen Elizabeth sang nakabatyag sang luyag kay Prince Phillip samtang nangin tayuyon kag matawhay naman ang ila malawig nga pag-updanay bilang mag-asawa.
Aminado naman si Isogon nga tuman ang pagpalangga sang mga tawo sa reyna ilabi na nga 70 ka tuig ini nga nagpamuno nga nagresulta agud magpabilin nga nagahugpong ang United Kingdom.
Suno diri, lima ka tuig na ang nakaligad, ang Scotland ang nagpatigayon sang referendum sa pagsipak sa United Kingdom, apang nagdaog ang NO bangod sa maayo kag patas nga pagpamalakad sang reyna.
Gindumdom man sini nga sa pagproklamar kay King Charles III bilang panibag-o nga hari sa session council, ginhatagan sini sang importansya ang pagprotekta sa Church of Scotland.
