Naclaim na sang pamilya ang duha ka lalaki nga Filipino-American nga nalakip sa 19 ka gina-alegar nga New Peoples Army nga napatay sa engkwentro sa Brgy Salamanca, Toboso sang Abril 19.
Sa interview sang Bombo Radyo kay Pastor Rev. Moreto Panadero, nagapanag-iya sang Shekainah Funeral Services sa ciudad sang Escalante, naclaim na tanan sang pamilya ang siyam ka bangkay nga gindala sa punerarya.
Ang isa ka Filipino-American ang ginkilala nga si Lyles Prijoles, 40 anyos, nga nagikan pa sa San Diego, California, USA.
Ginkumpirmar sang grupo nga BAYAN USA, sa idalom sang Bagong Alyansang Makabayan (New Patriotic Alliance) ukon BAYAN nga isa ka Filipino-American journalist kag human rights advocate si Prijoles.
Samtang, ang isa naman naga-edad sang 26 kag ginaverify pa ang pangalan kag address sini.
Suno kay Panadero, nabyahe na padulong sa luwas sang pungsod ang bangkay sang duha ka Filipino-American matapos maclaim sang ila pamilya.
