Wala pa sang nag-claim nga pamilya sa nasapwan nga nagaka-agnas na nga bangkay sang babayi sa Sofia Gonzaga Avenue, Barangay Estefania Bacolod City sang Martes sang hapon.
Sa interview sang Bombo Radyo Bacolod kay Police Major Marc Joel Reclamado, station commander sang Bacolod Police Station 4, wala pa sang mga pamilya nga nagkadto sa nasambit nga police station agud nga mag-claim sa bangkay sang biktima.
Suno kay Reclamado, sa karun paagi sa koordinasyon sa Barangay Officials sang Barangay Estefania kag Bacolod City Health Office ginahikot na ang mga papeles agud nga mapalubong ang bangkay.
Suno kay Reclamado, ipalubong nalang bangud wala man sang may nag-claim apang kun may yara sang pamilya nga luyag magkuha sini mahimo man ipakita kag i-exhume ang bangkay.
Una na nga ginpahayag sang station commander sang Bacolod Police Station 4 nga nabatun na nila ang result sang post mortem examination gikan sa Bacolod City Health Office.
Sa resulta, nakita nga cardiovascular arrest ukon cardiac arrest ang kinamatay sang biktima, kag wala man sang senyales sang struggle.
Paathag ni Reclamado nga may suksok man nga underwear kag shorts ang biktima, kag ginabanta tatlo tubtob apat na ka semana sa area gani ini ang yara na sa advance stage of decomposition.
Bangod wala sang nakita nga foul play, ginalantaw sini nga mahimo nagpangihi ukon nagpahuway lamang sa area ang babayi sang gin-atake sang cardiac arrest.
Sa karun, padayun ang panawagan sang Bacolod Police Station 4 sa mga may himata nga babayi nga wala nakapauli sang kapin isa ka bulan agud ini ang ila maupdan sa pagtsekyar kun ila himata ang biktima.
