BACOLOD CITY – Narekober na ang bangkay sang manunudlo kag driver nga naanod matapos nga nahulog sa Himogaan River sa ciudad sang Sagay ang motorsiklo nga ila ginasakyan Biyernes sang aga.
Nahibaluan nga ang mga biktima nga sanday Rona Beleganio, 23-anyos, residente sang Sitio Intaplan, Brgy. Himoga-an Baybay kag manunudlo sang Shermanhill Elementary School kag ang nagamaneho sang habal-habal nga si Clodualdo Abisamis, 58 anyos sang Purok Malipayon, Brgy. Baviera sa amu man nga ciudad ang nahulog pasado las 7:00 kahapon sang aga kag gilayon nga namissing.
Suno kay Police Chief Inspector Robert Mansueto, hepe sang Sagay City Police Station, pasado las 9:00 kaina sang aga sang narekober ang bangkay ni Beleganio, mga 130 metros nagikan sa ila nga ginhulugan.
Wala pa naglutaw ang bangkay sini apang natapakan sang isa ka rescuer sa idalom sang tubig gani ginsalom kag nakumpirmar nga lawas sang tawo.
Igapaidalom pa sa autopsy examination ang bangkay sang manunudlo agud mahibaluan kun sa diin ang pilas sini apang ginapatihan nga nakalampos ini sa bato kag nalipungan amo gani nga nalumos.
Samtang, las 4:40 kaina sang hapon nakit-an naman ang bangkay ni Abisamis.
Santo sa impormasyon, nakit-an nga nagalutaw ang bangkay sang habal-habal driver sa ubos gid lamang kun sa diin nakit-an ang bangkay sang maestra kaina sang aga.
